कुरार पोलीस ठाण्यात लाचलुचपत प्रतिबंधक विभागाची धडक कारवाई… — १ लाखाची लाच घेताना दोन पोलीस अधिकारी जाळ्यात… — केबिनच्या झाडाझडतीत सापडले साडेसहा लाखांचे घबाड!

दिक्षा कऱ्हाडे 

 वृत्त संपादिका 

      मुंबईत भ्रष्टाचार प्रतिबंधक विभागाने (ACB) नुकतीच एक अत्यंत मोठी आणि खळबळजनक कारवाई केली आहे. 

       कायदा आणि सुव्यवस्था राखण्याची जबाबदारी ज्यांच्या खांद्यावर असते,तेच रक्षक आता भक्षक बनल्याचे एका ताज्या घटनेवरून उघडकीस आले आहे.

       मुंबईतील कुरार पोलीस ठाण्यामध्ये कार्यरत असणाऱ्या दोन वरिष्ठ पोलीस अधिकाऱ्यांना रंगेहाथ लाच स्वीकारताना अटक करण्यात आल्याने संपूर्ण पोलीस दलात एकच खळबळ उडाली आहे. 

        या प्रकरणाच्या तपासादरम्यान एक अत्यंत धक्कादायक बाब समोर आली असून,कारवाईनंतर पोलीस ठाण्यात जेव्हा या अधिकाऱ्यांच्या केबिनची झाडाझडती घेण्यात आली,तेव्हा तिथे तब्बल ६ लाख ३४ हजार रुपयांची मोठी रोख रक्कम आढळून आली आहे.

          मिळालेल्या सविस्तर माहितीनुसार,एका तक्रारदाराच्या विरोधात आधीच दाखल असलेल्या एका प्रकरणाशी संबंधित पुढील कारवाई करण्यासाठी आणि गुन्हा नोंदवण्याच्या बदल्यात कुरार पोलीस ठाण्याचे वरिष्ठ पोलीस निरीक्षक (सीनिअर पीआय) आणि त्यांच्या एका सहकारी अधिकाऱ्याने चक्क तीन लाख रुपयांच्या लाचेची मागणी केली होती. 

        या ठरलेल्या तीन लाख रुपयांच्या रकमेपैकी दोन लाख रुपये याआधीच संबंधित तक्रारदाराकडून या अधिकाऱ्यांनी उकळले होते.

        परंतु,उर्वरित एक लाख रुपयांची लाचेची रक्कम देण्यास तक्रारदाराचा विरोध होता.पैशांसाठी वारंवार तगादा लावला जात असल्याने,या त्रासाला कंटाळून संबंधित तक्रारदाराने थेट लाचलुचपत प्रतिबंधक विभागाच्या (एसीबी) कार्यालयात धाव घेतली आणि या अधिकाऱ्यांविरुद्ध रीतसर तक्रार दाखल केली.

           या गंभीर तक्रारीची तत्काळ दखल घेत एसीबीने अत्यंत गुप्तपणे प्राथमिक चौकशी सुरू केली.या चौकशीत तथ्य आढळल्यानंतर,एसीबीच्या पथकाने या भ्रष्ट अधिकाऱ्यांना रंगेहाथ पकडण्यासाठी एक अचूक सापळा रचला.

         आखलेल्या योजनेनुसार, बुधवारी रात्री तक्रारदाराकडून उरलेली एक लाख रुपयांची लाच स्वीकारत असताना कुरार पोलीस ठाण्याचे वरिष्ठ पोलीस निरीक्षक संजीव तावडे आणि पोलीस उपनिरीक्षक (पीएसआय) ज्ञानेश्वर जुन्ने या दोघांनाही लाचलुचपत प्रतिबंधक विभागाच्या अधिकाऱ्यांनी ताब्यात घेतले.

         अटक केल्यानंतर एसीबीच्या पथकाने पुढील तपासाचा भाग म्हणून पोलीस ठाण्यातील वरिष्ठ निरीक्षकाच्या केबिनची कसून तपासणी केली.

        या झाडाझडती दरम्यान अधिकाऱ्यांनी जेव्हा कपाट उघडले तेव्हा त्यांनाही मोठा धक्का बसला.कारण,तिथे लपवून ठेवलेली तब्बल ६ लाख ३४ हजार रुपयांची बेहिशेबी रोख रक्कम तपास पथकाला सापडली. 

       एसीबीने तातडीने योग्य ते पंचनामे पूर्ण करून ही संपूर्ण रोख रक्कम जप्त केली आहे.या घटनेनंतर दोन्ही आरोपी अधिकाऱ्यांना अटक करण्यात आली असून, शन्यायालयाकडून त्यांना २३ तारखेपर्यंत एसीबीच्या कोठडीत पाठवण्यात आले आहे.या धडक कारवाईमुळे संपूर्ण पोलीस प्रशासनात मोठी खळबळ उडाली आहे.

          प्रामाणिकपणाचा केवळ बुरखा पांघरून सर्वसामान्य नागरिकांची आर्थिक लूट करणाऱ्या आणि त्यांना नाहक त्रास देणाऱ्या कोणत्याही भ्रष्ट अधिकाऱ्याची गय केली जाणार नाही आणि त्यांच्यावर अतिशय कठोर कारवाई करण्यात येईल,असा स्पष्ट इशारा एसीबीने या कारवाईच्या निमित्ताने दिला आहे. 

          दरम्यान मुंबईसारख्या महत्त्वाच्या महानगरात जनतेचे रक्षण करणाऱ्या पोलिसांकडूनच अशा प्रकारे खुलेआम लाचेची मागणी केली जात असल्याने सर्वसामान्य नागरिकांमधून मोठा संताप आणि तीव्र नाराजी व्यक्त केली जात आहे.

           मात्र,एसीबीने केलेल्या या मोठ्या कारवाईमुळे प्रशासनात चाललेल्या भ्रष्टाचाराला आळा घालण्यासाठी आणि त्याविरुद्धच्या लढ्याला नक्कीच एक मोठे बळ मिळेल,अशी आशा आता जनतेकडून व्यक्त केली जात आहे.