दिक्षा कऱ्हाडे
वृत्त संपादिका
गडचिरोली – आदिवासींचे अस्तित्व आणि ओळख धोक्यात आली आहे. आदिवासी संस्कृती आणि इतिहास पुसून टाकण्याचे प्रयत्न सुरू आहेत आणि हे आदिवासी समुदायासाठी अतिशय गंभीर आणि धोकादायक बाब आहे.
या प्रयत्नांना हाणून पाडण्यासाठी जोरदार आवाज उठवला पाहिजे, हे मत आंतरराष्ट्रीय आदिवासी हक्क दिनानिमित्त शनिवारी येथील केमिस्ट भवनात वीर बाबुराव प्रबोधन समितीने आयोजित केलेल्या चर्चासत्रात वक्त्यांनी व्यक्त केले.
९ ऑगस्ट २००७ रोजी आदिवासी दिनाचा प्रस्ताव संयुक्त राष्ट्र संघाच्या आम सभेत ठेवण्यात आला व १३ सप्टेंबर २००७ रोजी आदिवासींच्या हक्कांचा जाहीरनामा संयुक्त राष्ट्र संघाच्या आम सभेत मंजूर करण्याचा ऐतिहासिक निर्णय घेण्यात आला, यास्तव १३ सप्टेंबर हा दिवस आंतरराष्ट्रीय आदिवासी हक्क दिन म्हणून करण्यात येतो.
समितीचे अध्यक्ष वसंतराव कुलसंगे कार्यक्रमाच्या अध्यक्षस्थानी होते तर ज्येष्ठ पत्रकार रोहिदास राऊत, माजी नगरसेवक गुलाबराव मडावी, कार्यकर्ते प्रा.अनिल होळी, र्युब्लिकन पक्षाचे हंसराज उंदीरवाडे, ऑल इंडिया आदिवासी कर्मचारी महासंघाचे आनंद कंगाली, आदिवासी कार्यकर्ते सुखदेव वेठे हे प्रमुख उपस्थित होते.
आदिवासी हे जगातील मूळ रहिवासी आहेत. त्यांनी जगाच्या अनेक भागांवर राज्य केले आणि भारताच्या स्वातंत्र्य लढ्यातही खूप महत्त्वाची भूमिका बजावली.जल, जंगल आणि जमीन राखण्यातही आदिवासींनी मोठे योगदान दिले आहे.
तथापि, सरकारच्या दुर्लक्षामुळे त्यांची सध्याची स्थिती अत्यंत दयनीय झाली आहे. शिक्षण, आरोग्य इत्यादी मूलभूत मानवी सुविधांपासून ते दूर राहिले आहेत आणि दयनीय जीवन जगत आहेत, असे वक्त्यांनी निदर्शनास आणून दिले.
आदिवासींची एक समृद्ध संस्कृती आणि परंपरा आहे जी सर्वांचा आणि पर्यावरणाचा आदर करते. तथापि, काही शक्तींकडून त्यांची समृद्ध परंपरा आणि ओळख पुसून टाकण्यासाठी पद्धतशीर प्रयत्न केले जात आहेत. अशा प्रयत्नांना हाणून पाडण्यासाठी संपूर्ण आदिवासी समुदायाने सतर्क राहून या आदिवासी जमातीची ओळख आणि अस्तित्व पुढे नेण्यासाठी काम केले पाहिजे, असे वक्त्यांनी पुढे सांगितले.
या चर्चासत्रात श्री.नागोराव उईके, प्रदीप भैसारे, मनोहर आलमपटलावर, शांता येर्मे, नथुजी चिमुरकर, पुरुषोत्तम शिदाम, एम.डी.चालख, हर्षवर्धन कुलसंगे, शकुंतला चिमुरकर आणि इतर अनेक उपस्थित होते.
