दै.पुण्यनगरी’ या लोकप्रिय दैनिकाचे संस्थापक मुरधीलर शिंगोटे यांचे निधन !

0
77

पंडित मोहिते-पाटील
उपसंपादक
‘दखल न्युज भारत’

मुंबई, दि.६ : ‘दै.पुण्यनगरी’ या लोकप्रिय दैनिकाचे संस्थापक तथा मालक मुरलीधर (बाबा) शिंगोटे यांचे आज (गुरुवारी) दुपारी १ वाजण्याच्या सुमारास त्यांच्या मुळगावी वयाच्या ८३ वर्षी वृध्दापकाळानं निधन झालं. शिंगोटे हे मुळचे पुणे जिल्ह्यातील जुन्नर तालुक्यातील गायमुखवाडी येथील होते. ‘दै.पुण्यनगरी’, ‘मुंबई चौफेर’, ‘आपला वार्ताहर’, ‘यशोभुमी’, ‘कर्नाटक मल्ला’सह इतर काही ‘अग्रगण्य’ दैनिक त्यांनी सुरु केली होती.

वृत्तपत्र क्षेत्रातील अनुभवाची शिदोरी ताब्यात असलेल्या शिंगोटेंना आपलेही एखादे दैनिक असावे याबाबतचा विचार मनात रुंजी घालू लागला. त्यानुसार त्यांनी १९९९-२००० च्या दरम्यान ‘मुंबई चौफेर’ हे टॅब्लॉईड सायंदैनिक सुरु केले. त्यानंतर ‘आपला वार्ताहर’, ‘पुण्यनगरी’, ‘हिंदमाता’, ‘कर्नाटक मल्ला’ ही दैनिके कोणतेही भांडवल पाठिशी नसतांना फक्त वाचकांच्या जोरावर शिंगोटेंनी सुरु केली होती.

यातील ‘पुण्यनगरी’ दैनिक महाराष्ट्रातील वृत्तपत्र क्षेत्रातील मैलाचे दगड ठरले. पश्‍चिम महाराष्ट्र, मुंबई, उत्तर महाराष्ट्र, मराठवाडा, विदर्भ याठिकाणी ‘दैनिक पुण्यनगरी’च्या जिल्हावार आवृत्त्या आहेत. खपाच्या दृष्टिकोनातून ‘पुण्यनगरी’ने आपला स्वतंत्र असा वाचकवर्ग तयार केला आहे. २००२-२००३ ला सुरु झालेल्या या दैनिकाने अल्पावधीतच यश संपादन केले, हे केवळ मुरलीधर शिंगोटे यांच्या अनुभवामुळेच.

साधी राहणी आणि उच्च विचारसरणी हा नियम शिंगोटे यांनी तंतोतंत पाळला. एवढ्या मोठ्या वृत्तपत्राचे मालक असुनसुद्धा शिंगोटे यांनी खोट्या व बेगडी प्रसिद्धीला कधीच थारा दिला नाही. भूक लागली तर प्रसंगी वडापावच्या गाडीवर थांबून वडापाव खाणारा माणूस. कुठल्याही भांडवलदारी शेठजी-भटजींची हुजूरेगिरी न करता शिंगोटेंनी आपल्या कार्यकर्तृत्वाचा ठसा मराठी वृत्तपत्रसृष्टिमध्ये उमटवला होता. महाराष्ट्रातील असंख्य तरुणांचे वृत्तपत्र व्यवसायाच्या माध्यमातून संसार उभे करण्यात मुरलीधर शिंगोटेंचे मोठे योगदान आहे. वृत्तपत्र विक्रेता ते महाराष्ट्रातील वृत्तपत्र समुहाचे मालक असा त्यांचा प्रवास मराठी माणसाला प्रेरणादायी आहे.

आदरणीय मुरलीधर शिंगोटेंना ‘दखल न्युज भारत’ परिवारातर्फे भावपूर्ण श्रद्धांजली !